XƏBƏRLƏR
16:58, 17.11.2026
Milli Dirçəliş Günü: Tarixi keçmişdən güclü gələcəyə
17 Noyabr – Milli Dirçəliş Günü Azərbaycan xalqının azadlıq və müstəqillik uğrunda mübarizə tarixinin ən əlamətdar səhifələrindən biridir. Bu gün xalqımızın milli oyanışının, birlik və həmrəylik ideyalarına sadiqliyinin rəmzi kimi qeyd olunur.
1988-ci il noyabrın 17-də Bakının Azadlıq meydanında başlayan kütləvi mitinqlər xalqın milli hüquqlarının müdafiəsi, Azərbaycanın ərazi bütövlüyünün qorunması və azadlıq tələblərinin ifadəsi baxımından mühüm tarixi hadisəyə çevrildi. Həmin dövrdə geniş vüsət alan milli azadlıq hərəkatı Azərbaycan xalqının müstəqillik iradəsinin formalaşmasında mühüm rol oynadı.
1990-cı il noyabrın 17-də Ümummilli lider Heydər Əliyevin rəhbərliyi ilə keçirilən Naxçıvan Muxtar Respublikası Ali Sovetinin sessiyasında müstəqillik yolunda mühüm qərarlar qəbul edildi. Həmin tarixi hadisələrin əhəmiyyəti nəzərə alınaraq, 1992-ci ildən etibarən noyabrın 17-si Milli Dirçəliş Günü kimi qeyd olunur.
Milli Dirçəliş Günü bu gün də xalqımızın azadlıq əzmini, milli birliyini və dövlət müstəqilliyinə bağlılığını təcəssüm etdirir. Bu əlamətdar tarix müstəqil Azərbaycanın dövlətçilik ənənələrinin qorunmasının və gələcək nəsillərə ötürülməsinin vacibliyini bir daha xatırladır.